Diyor Imomxo‘jayev O‘zbekiston Professional futbol ligasi bosh direktori lavozimida faoliyatini davom ettiradigan bo‘ldi. PFL Ijroiya qo‘mitasining sakkiz nafar a’zosi uning nomzodini bir ovozdan qo‘llab-quvvatladi.
Mazkur masala 19-avgust kuni o‘tkazilgan Ijroiya qo‘mitasi yig‘ilishida ko‘rib chiqildi. Unda qo‘mitaning barcha a’zolari ishtirok etdi. Odil Ahmedov va Alisher Yusupov Kuala-Lumpurdan, Elbek Samatov esa Andijondan turib masofaviy tarzda ovoz berdi.
Diyor Imomxo‘jayevning nomzodi O‘zbekiston futbol assotsiatsiyasi prezidenti Bahodir Qurbonov tomonidan ilgari surilgan. U imzolagan taqdimnoma 17-avgust kuni PFL Ijroiya qo‘mitasiga yuborilgan.
Ovoz berish yakunlariga ko‘ra, Diyor Imomxo‘jayev navbatdagi vakolat muddati uchun O‘zPFL bosh direktori etib tasdiqlandi.
U 2026-yil 19-avgustdan boshlab tashkilotni yana to‘rt yil davomida boshqaradi.
⠀
⠀
⠀
